A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Monday 31 March 2014

បក្ស​សង្គ្រោះ​ជាតិ​ប្រកាស​បន្ត​ធ្វើ​បាតុកម្ម​បើ​ការ​ចរចា​មិន​ត្រូវ​គ្នា Opposition warns of new protest if no fresh election [if negotiation does not move forward]

PHNOM PENH (The Cambodia Herald)- The opposition Cambodia National Rescue Party today decided that if there will be no fresh election and the reform of the National Election Committee, it would restart the protest. The opposition also reaffirmed its position to demand the minimum wage of USD160 per month for the garment workers. Most of the decisions of today’s people’s congress led by the opposition are the demands which were denied already by the ruling Cambodian People’s Party led by Prime Minister Hun Sen, leading to a concern that the two winning parties will not be able to break the political deadlock in the near future. 

ដោយ វណ្ណ វិចារ 2014-03-30
សង្គ្រោះ​ជាតិ ៦១០
អ្នក​គាំទ្រ​គណបក្ស​សង្គ្រោះ​ជាតិ ហែ​ក្បួន​ឡើង​លើ​ស្ពាន​អាកាស​ក្បាល​ថ្នល់ ឆ្ពោះ​ទៅ​ទីស្នាក់ការ​គណបក្ស​នៅ​សង្កាត់​ចាក់អង្រែលើ ធ្វើ​សមាជ​ប្រជាជន នៅ​ថ្ងៃ​៣០ មីនា ឆ្នាំ​២០១៤។
RFA/Van Vichar
គណបក្ស​សង្គ្រោះ​ជាតិ ប្រកាស​នឹង​បន្ត​ធ្វើ​បាតុកម្ម​ជា​ថ្មី​ទៀត​នៅ​ទូទាំង​ប្រទេស បើ​សិន​ណា​ការ​ចរចា​ផ្នែក​នយោបាយ​មិន​ត្រូវ​ទេ​នោះ។ ការ​ប្រកាស​នេះ​ធ្វើ​ឡើង​ក្នុង​សមាជ​អ្នក​គាំទ្រ​នៅ​ថ្ងៃ​ទី​៣០ ខែ​មីនា នា​ទីស្នាក់ការ​កណ្ដាល​គណបក្ស​សង្គ្រោះ​ជាតិ សង្កាត់​ចាក់អង្រែលើ។
បាតុកម្ម​ជា​ជម្រើស​មិន​អាច​ខ្វះ​បាន បើ​សិន​ណា​គណបក្ស​ប្រជាជន​កម្ពុជា មិន​ព្រម​តាម​សំណើ​របស់​បក្ស​ប្រឆាំង​ទេ​នោះ។
ពិធី​បង្សុកូល​រំលឹក​វិញ្ញាណក្ខន្ធ​ដល់​អ្នក​ស្លាប់​ដោយសារ​គ្រាប់បែក​កាល​ពី​ឆ្នាំ​១៩៩៧ ត្រូវ​បាន​បញ្ចប់។ មេដឹកនាំ​គណបក្ស​ប្រឆាំង បាន​ដឹកនាំ​អ្នក​គាំទ្រ​ដើរ​ដង្ហែ​ក្បួន​តាម​ដង​ផ្លូវ​ត្រឡប់​ទៅ​កាន់​ទីស្នាក់ការ​គណបក្ស ដើម្បី​រៀបចំ​សមាជ​ប្រជាជន។ សមាជ​ប្រជាជន​នេះ គឺ​គ្រោង​ធ្វើ​នៅ​ជិត​ វត្ត​បទុមវតី​ឯ​ណោះ​ទេ តែ​អាជ្ញាធរ​មិន​អនុញ្ញាត ហេតុ​នេះ គណបក្ស​ប្រឆាំង​ក៏​ប្ដូរ​ទីតាំង​ធ្វើ​សមាជ​តែម្ដង​ទៅ។
កំណាត់​ផ្លូវ​ដែល​ក្បួន​ហែ​ឆ្លង​កាត់​បាន​កក​ស្ទះ​ចរាចរណ៍​ដោយ​អន្លើ អ្នក​ដំណើរ​ខ្លះ​ខំ​ជិះ​ប្រជ្រៀត​ក្បួន និង​អ្នក​ខ្លះ​ទៀត​ឈប់​រង់ចាំ​ឲ្យ​ក្បួន​ហែ​ហួស។ តាម​បណ្ដោយ​ផ្លូវ​ក្រាល​កៅស៊ូ​ក្រោម​កម្ដៅ​ថ្ងៃ​ក្ដៅ​ហែង មេ​បក្ស​ប្រឆាំង​បាន​ដឹកនាំ​ក្បួន​ដង្ហែ​ដើរ​បណ្ដើរ​ស្រែក​បណ្ដើរ​ពី​ការ​ទាមទារ​ចង់​កែទម្រង់​ស្ថាប័ន គ.ជ.ប និង​ទាមទារ​បោះ​ឆ្នោត​ឡើង​វិញ​ជាដើម។ សម្រែក​ដែល​ស្រែក​ឲ្យ​ដូរ​នាយករដ្ឋមន្ត្រី​ក៏​បាន​ឮ​ជា​ថ្មី ហាក់​ដូច​ជា​បាតុកម្ម​ដែល​ត្រូវ​អាជ្ញាធរ​វាយ​បំបែក​កាល​ពី​ខែ​មករា នោះ កក្រើក​ឡើង​វិញ​ដូច្នេះ​ដែរ។
លុះ​ធ្វើ​ដំណើរ​ដល់​មុខ​ទីស្នាក់ការ​គណបក្ស ប្រធាន​គណបក្ស​សង្គ្រោះ​ជាតិ លោក សម រង្ស៉ី ថ្លែង​ថា គណបក្ស​សង្គ្រោះ​ជាតិ ផ្អាក​ការ​ចរចា​ជាមួយ​បក្ស​កាន់​អំណាច ក៏​ព្រោះ​តែ​ចង់​ដោះស្រាយ​បញ្ហា​ជាតិ​ឲ្យ​បាន​ឆាប់។ លោក​បន្ត​ថា ជំហរ​របស់​បក្ស​សង្គ្រោះ​ជាតិ គឺ​ប្តូរ គ.ជ.ប ឲ្យ​បាន​ជា​មុន​សិន មុន​នឹង​កែ​ទម្រង់​លើ​ផ្នែក​ផ្សេងៗ​ទៀត។
លោក​បញ្ជាក់​ថា បើ​ទាមទារ​មិន​បាន​តាម​ឆន្ទៈ​រាស្ត្រ​ទេ​នោះ បក្ស​សង្គ្រោះ​ជាតិ នឹង​ធ្វើ​មហា​បាតុកម្ម​នៅ​ទូទាំង​ប្រទេស៖ «រឿង​ដំបូង​បំផុត យើង​ត្រូវ​សម្រុក​ដោះស្រាយ​ប្តូរ គ.ជ.ប តែ​គណបក្ស​ប្រជាជន​គេ​ថា អត់​ញ៉ាំ​ត្រី​អាំង​ទេ គេ​ញ៉ាំ​ផ្លែ​អាយ។ យើង​មិន​អាច​ញ៉ាំ​ផ្លែអាយ​មុន​ត្រី​អាំង​ទេ មិន​អាច​ញ៉ាំ​បង្អែម​មុន​ចង្អាប​ទេ»
មេដឹកនាំ​គណបក្ស​ថ្លែង​សារ​រួច​រាល់ គឺ​ដល់​វេន​អ្នក​គាំទ្រ​ម្ដង។ តំណាង​អ្នក​គាំទ្រ​ប្រមាណ​ជិត ១០​នាក់ បាន​ស្នើ​លើ​ចំណុច​សំខាន់ៗ​មួយ​ចំនួន ដូចជា​ទាមទារ​កែ​ទម្រង់​ការ​បោះ​ឆ្នោត​ប្ដូរ​សមាសភាព គ.ជ.ប និង​ពិសេស​មិន​ឲ្យ​តំណាងរាស្ត្រ​គណបក្ស​ប្រឆាំង​ចូល​ប្រជុំ​សភា។
លុះ​ដល់​ពេល​ប្រកាស​លទ្ធផល​របស់​អង្គ​សមាជ មន្ត្រី​ជាន់​ខ្ពស់​គណបក្ស លោក ហូរ វ៉ាន់ យក​ឯកសារ​លទ្ធផល​សម្រេច​ចិត្ត​ដែល​ទំនង​ជា​រៀបចំ​ទុក​ជា​មុន​ផង​នោះ ដោយ​ចែង​ថា បក្ស​ប្រឆាំង​ស្នើ ៥​ធំៗ។ ចំណុច​ទី​១ បន្ត​ស្វែង​រក​យុត្តិធម៌​ជូន​ម្ចាស់​ឆ្នោត ទី​២ បើ​មាន​ការ​បោះ​ឆ្នោត​ឡើង​វិញ ត្រូវ​ទាម​ទារ​ឲ្យ​មាន​ភាព​សេរី​ត្រឹមត្រូវ និង​យុត្តិធម៌ ហើយ គ.ជ.ប ត្រូវ​តែ​ឯករាជ្យ ទី​៣ បើ​គ្មាន​ការ​ដោះស្រាយ​បញ្ចប់​ពី​ភាព​មិន​ប្រក្រតី​ទាំង​ឡាយ​ទេ​នោះ តំណាងរាស្ត្រ​បក្ស​ប្រឆាំង​មិន​ចូល​សភា​ឡើយ ចំណុច​ទី​៤ ពេល​មិន​ប្រជុំ​សភា បក្ស​សង្គ្រោះ​ជាតិ ត្រូវ​តែ​ធ្វើ​បាតុកម្ម​ទូទាំង​ប្រទេស បន្ត​ធ្វើ​នយោបាយ​ការទូត​ប្រាប់​បរទេស​ថា រដ្ឋាភិបាល​បច្ចុប្បន្ន​មិន​ស្រប​ច្បាប់ ចុះ​ជួប​ពលរដ្ឋ​តាម​មូលដ្ឋាន​ជាដើម ទី​៥ រាល់​ការ​ទាមទារ​របស់​គណបក្ស​សង្គ្រោះ​ជាតិ ត្រូវ​លើក​ចំណុច​មួយ​ចំនួន​ទៀត ដូចជា​ដោះលែង​អ្នក​ទោស​មនសិការ លុប​ចោល​បម្រាម​មិន​ស្រប​ច្បាប់ គាំទ្រ​ប្រាក់​ខែ​គោល ១៦០​ដុល្លារ​ជូន​កម្មករ អនុវត្ត​តួនាទី​កម្លាំង​ប្រដាប់​អាវុធ តុលាការ ជាដើម។
អនុ​ប្រធាន​គណបក្ស​សង្គ្រោះ​ជាតិ លោក កឹម សុខា លើក​ឡើង​ថា ចំណុច​អាទិភាព​ដំបូង​បំផុត គឺ​ទាមទារ​ឲ្យ​បោះ​ឆ្នោត​ឡើង​វិញ និង​ប្ដូរ​សមាសភាព​គណៈកម្មាធិការ​ជាតិ​រៀបចំ​ការ​បោះ​ឆ្នោត។ ប៉ុន្តែ​បើ​ទាមទារ​ចំណុច​២​នេះ​មិន​បាន គឺ​បក្ស​សង្គ្រោះ​ជាតិ ត្រូវ​ធ្វើ​បាតុកម្ម​ជា​ដាច់​ខាត។
ទាក់ទង​នឹង​ការ​ធ្វើ​បាតុកម្ម​នេះ លោក​នាយករដ្ឋមន្ត្រី ហ៊ុន សែន មាន​ប្រសាសន៍​បញ្ជាក់​ជំហរ​របស់​រដ្ឋាភិបាល​ថា អាជ្ញាធរ​មាន​សមត្ថកិច្ច​មិន​ហាន​ឃាត់​ការ​អនុវត្ត​សិទ្ធិ​សេរីភាព​របស់​ប្រជាពលរដ្ឋ​ទេ ប៉ុន្តែ​បើ​គណបក្ស​ប្រឆាំង​ធ្វើ​បាតុកម្ម អ្នក​គាំទ្រ​បក្ស​ប្រជាជន​ក៏​ធ្វើ​បាតុកម្ម​ដំណាល​គ្នា​ដែរ ហើយ​ពេល​ខ្លះ ទីលាន​ប្រជាធិបតេយ្យ​អាច​ត្រូវ​ពុះ​ជា​ពីរ​សម្រាប់​បាតុកម្ម​ប្រឆាំង និង​បាតុកម្ម​គាំទ្រ​ទៀត​ផង៖ «សុំ​ផ្តាំ​ទៅ​អាជ្ញាធរ​គ្រប់​លំដាប់​ថ្នាក់​ឲ្យ​ហើយ បើ​ក្រុម​ប្រឆាំង​មាន​សិទ្ធិ​ក្រុម​អ្នក​គាំទ្រ​ក៏​មាន​សិទ្ធិ​ដែរ។ឧបមា​ថា ភ្នំពេញ​មាន​មួយ​កន្លែង វា​មិន​ដឹង​បញ្ចៀស​ទៅ​ណា អា​ហ្នឹង​ទីលាន​ប្រជាធិបតេយ្យ ត្រូវ​ពុះ​ជា​ពីរ​ហើយ បើ​មិន​ដាក់​របង​ដែក ក៏​ដាក់​របង​ថ្ម​ដែរ បើ​ប្រើ​ប៉ូលិស​ទៅ​គឺ​ពិបាក។ ម្ខាង​ធ្វើ​បាតុកម្ម​គាំទ្រ ម្ខាង​ធ្វើ​បាតុកម្ម​ប្រឆាំង ហើយ​ក៏​អោយ​អ្នក​ដទៃ​ភ្លឺ​ភ្នែក​ដែរ កុំ​អី​ឆន្ទៈ​រាស្ត្រ អី​ឆន្ទៈ​រាស្ត្រ​នោះ»
គណបក្ស​សង្គ្រោះ​ជាតិ បាន​ធ្វើ​បាតុកម្ម​លើក​ចុង​ក្រោយ​រយៈពេល ៣​សប្ដាហ៍។ បាតុកម្ម​នេះ​ត្រូវ​បាន​វាយ​បំបែក​ដោយ​កងកម្លាំង​សន្តិសុខ​សាលា​រាជធានី​ភ្នំពេញ ព្រម​ទាំង​រឹបអូស​សម្ភារៈ​ជា​ច្រើន​ទៀត។ មិន​តែប៉ុណ្ណោះ អាជ្ញាធរ​ចេញ​បម្រាម​មួយ​ដែល​ហាម​មិន​ឲ្យ​មាន​ការ​ជួប​ជុំ​នៅ​ទីលាន​ប្រជាធិបតេយ្យ​ទៀត​ផង។ បម្រាម​នេះ​ត្រូវ​បាន​សង្គម​ស៊ីវិល​ចាត់​ទុក​ថា ជា​បម្រាម​ខុស​ច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

No comments: